Livsskildring med politisk sprengkraft

Gater jeg har levd, debutboka til den mestseljande biletkunstnaren Nikolai Torgersen, har alt fått ei lang rekkje begeistra omtalar, han ligg kort og godt an til å bli ein like stor sensasjon litterært som han i 2021 vart i kunstmiljøet. Og eg føyer meg inn i rekkja, dette er ei uhyre sterk lesaroppleving som eg vil råde alle til å få med seg. Forfattaren har ei god, jævlig historie å fortelje om korleis han gjekk gjennom ei uendelegheit av traumatiserande erfaringar, først i barndomen og så som heimlaus rusmisbrukar, før han gjennom kunsten skapte seg eit liv i materiell overflod. Men like viktig som historia, er refleksjonane Torgersen gjer seg om erfaringane. Då held han også opp ein spegel der den gjengse middelklasselesaren kan sjå seg sjølv frå ein lite flatterande vinkel.